«Ашаршылық жайлы кітап оқимыз»

2020 жылдың 20 мамыр күні Бірлік ауылдық кітапханасы «Ашаршылық жайлы кітап оқимыз» атты айдармен библиопост жобасын оқырман назарына ұсынды.

Мақсаты: Саяси қуғын-сүргін құрбандарын еске алу. Олардың өмір жолдарымен оқырманды тереңірек таныстыру, өткен тарихымыздан тағылым ала отырып, бүгінгі ұрпаққа әр кітап арқылы өнегелі тәрбие беру, оларды Отанын сүюге, елін, жерінің адал патриоттары болуға баулу, олардың санасына тарихи шындықты жеткізу. 1927-1953жж. ақтаңдақтар ақиқатын түсіндіруге ұмтылу.

Қызыл империяның қолымен жасалған, 1931-33 жылдардағы алапат аштық қазақ халқын тарихта бұрын-соңды болмаған қырғынға ұшыратып, тең жартысына жуығын жалмады. Тарихымызда бұрын айтылмай келген аталмыш ақтаңдақ туралы деректі, зерттеу мақалалардан тұратын бірді-екілі кітап жарық көрген болатын. Ал бұл кітапта сол аштықтың зардабын тартып, өздері де бір өліп, бір тірілген тірі куәгерлер көздерімен өріп, бастарынан өткерген зұлмат жылдар трагедиясын баяндайды.

Кітапта 1931-1933 жылдардағы аштық туралы тоталитарлық жүйе тұсында шындықты айтуға тыйым салынғаны, тағдыры тәлкекке түсіп, небір сұмдықты өз бастарынан кешіріп, тірі қалғандардың аянышты тағдырлары жазылған.