«Тәуелсіздік – ұлы мұрат, қастерлі ұғым»

2021 жылдың 11 қаңтарында Жаңақорған аудандық орталық кітапханасында Тәуелсіздіктің 30 жылдық мерейтойына орай «Тәуелсіздік – ұлы мұрат, қастерлі ұғым» атты кітап көрмесінің ашылуы болып өтті. Көрменің мақсаты – қазақ мемлекетінің сан ғасыр қалыптасу тарихындағы уақыт пен ұрпақтар сабақтастығын көрсету, тәуелсіздік жолындағы ерлік күресімен, қол жеткен жетістіктерімен таныстыру. Отыз жыл уақыт ішінде ордалы елге айналған Тәуелсіз Қазақстанның дербес мемлекет ретінде қалыптасу тарихына шолу жасау.

Көрме «Тәуелсіз Қазақстан», «Қазақстан жасампаз жетістіктер жолында», «Желтоқсан – тәуелсіздік шежіресі», «Тәуелсіздігіміздің 30 жылдығына 30 кітап» атты тақырыптардан тұрады. Көрмеге ежелден еркіндікті аңсап, азаттықты көксеумн келе жатқан еліміздің тарихын баяндайтын қазақ хандығы кезеңінен бүгінгі күнге дейінгі әдебиеттер мен Тұңғыш Президентіміздің «Тәуелсіздік белестері», А.Айталының «Байсалды ел байқаусыз қате жібермес», «Тәуелсіздік шежіресі», Ш.Елеукеновтың «Тәуелсіздік биігінен», М.Жолдасбековтың «Тәуелсіздік тағылымы», Ә.Нысанбаевтың «Тәуелсіздік. Демократия. Гуманизм», «Тәуелсіздік толғауы» сериясымен шыққан кітаптар жинағы қойылды. Сонымен қатар Тәуелсіздік тарихы және 1986 жылы 16 желтоқсан оқиғасына түрткі болған себептер мен демократия жолында құрбан болған ұл-қыздардың ерліктері жайында материалдар ұсынылды.

Шара барысында аудан әкімі аппараттының ұйымдастыру және бақылау бөлімінің инспекторы, жас ақын  Ерсұлтан Жанболат «Тәуелсіздік» атты арнау өлеңін оқыды.

Көрменің тағы бір басты бөлімі «Тәуелсіздігіміздің 30 жылдығына 30 кітап» атты көрмесінің ашылуы өтті. Кітап көрмесімен оқу залының кітапханашасы Ә.Сағатқызы таныстырып әдебиеттерге шолу жасады.

Көрмеде жергілікті жазушы Т.Нұрмағамбетовтың «Періштелердің өлімі» атты кітабына «Жаңақорған тынысы» газетінің бас редакторының орынбасары Б.Үсейнова қысқаша талдау жасады.