Адырбек Сопыбековтың есімі берілді

16 қыркүйек күні  Жаңақорған аудандық кітапханасына Жазушылар одағының мүшесі, Қазақстанның Құрметті журналисі, Қызылорда облысының Құрметті қайраткері, Жаңақорған ауданының құрметті азаматы, ақын Адырбек Сопыбековтың есімі берілді.

Салтанатты шараға аудан әкімі Мұрат Жолкелдіұлы, облыстық мәслихат депутаты, белгілі меценат Ысқақ Жанкелді Ойшыұлы, ардагер ұстаз, ауданның Құрметті азаматы Зинабдин Шермағамбетов, зиялы қауым өкілдері және ақынның жұбайы Шарипа Шерімбетова, балалары мен өмірдегі достары қатысты.

Ашылу салтанатында аудан әкімі Мұрат Жолкелдіұлы Адырбек Сопыбековтың туған өлкеміздің тарихын таныту жолындағы, мәдениет саласына сіңірген еңбектерін атап өтіп, артына өшпес мол мұра қалдырғанын сөз етті.

Шара барысында аудандық балалар кітапханасында ақын шығармашылығына арналып ашылған «Балалар жүрегінің бағбаны» атты арнайы бұрышпен қонақтар танысып, кішкентай бүлдіршініміз Ержанқызы Раяна А.Сопыбековтың ең алғашқы жазған «Сынық әйнек»атты өлеңін оқып берді. Кітапхана оқырмандары Жанболат Бексұлтан мен Қалдыбек Раяна ақынның «Қыз бен жігіттің айтысы» атты өлеңінен көрініс көрсетті. 2022 жыл — Балалар жылы аясында, «Балалар әдебиетінің абызы – Адырбек» жобасына орай   «Ақын шығармашылығы балалар көзімен» атты ақынның өлеңдерінен аудандық суретшілер байқауы өткізіліп, жеңімпаз балалардың суреттерінен көрме ұйымдастырылды. Шара барысында қолөнерші Садықов Пахриддин сурет байқауына қатысқан 60 баланың ішінен оза шауып бәйге алған, үздік 10 суретші балаларға арнаған сый-сияпаттарын, марапаттарын тапсырды.