«Әжелер өсиеті» атты әжелер сайысы

19 наурыз күні Жаңақорған аудандық балалар кітапханасының қатысуымен  22 наурыз – Наурыз мейрамына орай  «Жұбаныш-А» бөбекжай  балабақшасында  жас ұрпақты ата — баба дәстүрімен тәрбиелеу,  әже тәрбиесін үлгі ету, әжелер айтқаны асыл екенін, әрі олардың өнегесін күнделікті өмірде пайдалану, әжелер өнегесінің ерекшелігін ашу, баланы кішіпейілділікке, қарт адамдарды құрметтеуге үйрету мақсатында  «Әжелер өсиеті» атты  әжелер сайысы өткізілді. Шараға қатысқан әжелер немерелерімен бірге  «Салем сөздің анасы» (өз-өзін таныстыру),  «Әжемнің айтқан ертегісі» (ертегі айтып беру),  «Сыр сандық» (сұрақ-жауап),  «Салтым асыл қазынам» (салт-дәстүрден көрініс), «Баталы елге бақ қонар»  (әжелер бата береді)  атты кезеңдер бойынша  сайысқа түсті. Шараға  кент әкімдігінің бас маманы Алма Мамирова, балалар кітапханасының меңгерушісі Мейрамкүл Жиенбаева, балабақша есепшісі Маусымжан Бекболатова әділқазылық қылып, әжелерге өз бағасын берді. Өнерлі әжелер  немерелерімен бірге әр кезеңде өздерін таныстырып,  ертегі айтып, тұсау кесіп, нәрестені бесікке салып, ән айтып, қазақтың салт-дәстүрлеріне байланысты сұрақтарға жауап беріп, наурыз  батасын беріп, көпшіліктің құрметіне, қошеметіне ие болды. Сайыс соңында «Өнегелі әже» номинациясымен Керімқұлова Оразкүл, «Аяулы әже» номинациясымен Оралова Ұлбике, «Мейірімді әже» номинациясымен Үсенова Ардақ, «Қамқор әже»  номинациясымен Тұрлыбекова Сара, «Мейірбан әже» номинациясымен Нурдиллаева Гүлдарі, «Шебер әже» номинациясымен Утешова Гулнара марапатталып, арнайы сый-сияпаттар табыс етілді.  Сайыс өте қызықты, жоғары деңгейде өтті. Кітапхананың коворкинг орталығында да  наурыз мейрамына орай «Наурыз — жарқын жыл басы» атты кітап көрмесісі жасалып, кітапхана оқырмандарына таныстырылды.