«KITAPшоу-2024» фестивалі

23 сәуір- Дүниежүзілік кітап және авторлық құқықты қорғау күніне орай Теміржол вокзалы ғимаратының ауласында орналасқан субұрқақ демалыс алаңында Жаңақорған ауданының мәдениет және тілдерді дамыту бөлімінің Адырбек Сопыбеков атындағы аудандық кітапхананың ұйымдастыруымен «KITAPшоу-2024» фестивалі өткізілді. Кітап фестиваліне зиялы қауым өкілдері, оқытушылар, жастар, кітапхана оқырмандары, мектеп оқушылары, БАҚ өкілдері қатысты.

Шарада аудан әкімінің орынбасары Б.Нуридинов құттықтау сөзімен ашып, «KITAPшоу-2024» фестивалінің басты мақсаты мен шара аясындағы әдеби танымдық, мәдени шараларға тоқталды.

Фестивальде қызыл кілем үстімен жүріп өткен кітап авторлары ақын Ф.Сахиев, Н.Елтай,Н.Жапеков, Е.Қалдыбек, А.Қамақ, «Жаңақорған тынысы» газетінің бас редакторы Б.Үсейінова, Бірлік ауылдық кітапхана жанынан құрылған «Ұшқын » атты кітап қоғамын құрған демеуші Д.Өтен және үздік оқырмандар аудан әкімінің орынбасары Б.Нуридиновтың Алғыс хатымен марапатталды. Мереке аясында кітаптар бульвары жасақталып «Бір ел бір кітап»акциясы аясында жазушы Б.Соқпақбаевтың 100 жылдығына орай «Қазақтың тау тұлғалы тарлан», Әлем әдебиетінің QR код кітаптары, балаларға арналған QR код кітаптары, «Тұсау кесер» кітаптары ұсынылса «Кітаппен бірге мәңгілік»атты кітаптар керуені, «Мерейтой-2024» кітап көрмесі жасақталып көпшілік қауымға ұсынылды. Ашық аспан аясында Әлшекей өнер мектебінің бишілер тобы би билеп, талантты суретшілері кітап авторларының суретін шығарма желісі бойынша салса, «Қыран» мектебінің оқушылары «Құпия кітап» атты биі және «Кітап ескірмейді», «Кітап сөйлейді» атты көріністерін көрсетіп тақпақтар айтылды. Шара соңы «Жаңақорған» әнімен шырқалып мерекелік концертке ұласты.