Абай – дара, Абай – дана қазақта!

А.Сопыбеков атындағы кітапхананың Оқырмандарға қызмет көрсету бөлімі мен балалар кітапханасының бірлесіп ұйымдастыруымен 10 тамыз – Абай күніне орай, «Абай – дара, Абай – дана қазақта!» атты әдеби-сазды кеш өткізілді. Оқырмандарды ұлы кемеңгер ақын Абай Құнанбаев шығармаларымен таныстыру,  насихаттау,  ақынның өлеңдері мен қарасөздерін оқу арқылы адамгершілікке, еңбекқорлыққа, адалдыққа баулу мақсатында өткізілген бұл шара кітапхана фойесінде жасалған   «Абайды оқы, таңырқа» атты  кітап көрмесінен бастау алды. Көрмені кітапханашы А.Шарап таныстырып, заманауи бағытта Абайтану ғылымына арналған кітаптармен таныстырды.  Шараға аудандық мәдениет және тілдерді дамыту бөлімінің басшысы Әбілқайыр Сыздықов, руханият жанашыры, ұстаз Батырхан Жоланов, «Жаңақорған тынысы» газетінің бас редакторы Баян Үсейінова  және кітапханамыздың  тұрақты  оқырмандары мен кітапханашылары қатысты. Шараны кітапхана директоры А.Тилеубергенова  жүргізіп, аудандық мәдениет және тілдерді дамыту бөлімінің басшысы Әбілқайыр Сыздықов ашып берді. Қатысушылар Ұлы Абайдың өмір жолы, еңбектері, барлық бағытқа бағытталған шығармалары жөнінде  кеңінен таратып айтып, ақын шығармашылығынан өлең, қарасөздерін, әндерін тыңдады. “Ұлы халықтың — ұлы Абайы” кітап көрмесімен кітапханашы З.Садыкова таныстырып, «Абайды білесіз бе?» атты аудан тұрғындарынан алынған сұрақ-жауап бейнеролигін тамашалады. Ақынның «Көзімнің қарасы» әнін Ергеш Дамир, «Өлсем орным қара жер» әндерін Көкен Өскенбай орындап, шараны қорытындылады.