Қазақтың ән өнерін байытқан композитор

1 қазан  күні  аудандық балалар кітапханасының ұйымдастыруымен Қазақстанның еңбек сіңірген мәдениет қайраткері, білім беру ісінің үздігі, әнші, сазгер  Бексұлтан Байкенжеевтің 75 жыл толуына орай, «Қазақтың ән өнерін байытқан композитор» атты әдеби кеш өткізілді.

Әдеби сазды кешке композитордың ұлы, Әбсұлтан Бексұлтанұлы және  сазгердің інісі, әнші Өтепберген Ердаулет қатысты.  Кеш барысында композитордың ел арасында кеңінен танымал болған «Ақбаян » әнін,  Заңғар интелектуалдық мектебінің «әуез» пәнінің мұғалімі Ислам Тоқпан орындады. Мектептің 5 – 8 сынып оқушылары  дайындаған өлең шумақтарын көпшілік қауымға ұсынды.

Кеш қонағымыз Әбсұлтан Бексұлтанұлы әкесі туралы естеліктермен бөлісіп, шығармашылықтарының шығу тарихы жайында сыр шертті. Сондай-ақ, сазгер-әншінің өмір жолы мен шығармашылығы жайында мәліметтер қойылған кітап көрмесін балалар бөлімінің кітапханашысы Айнұр Саттарқызы оқырман қауымға таныстырып өтті.

Кеш соңында Заңғар интелектуалдық мектебінің директоры Нұрхан Дүйсенханұлы  жылы лебізін білдіріп, кеш қонағы Өтепберген Ердаулет  сазгердің  «Сағынып жүрші » әнімен аяқтады. Мектеп ұжымының атынан  кеш қонақтарына қазақы салтпен сый құрмет көрсетілді.